อิธ ปน, ภิกฺขเว, วสฺสูปคตํ ภิกฺขุํ เวสี นิมนฺเตติ…เป.… ถุลฺลกุมารี นิมนฺเตติ… ปณฺฑโก นิมนฺเตติ… ญาตกา นิมนฺเตนฺติ… ราชาโน นิมนฺเตนฺติ… โจรา นิมนฺเตนฺติ… ธุตฺตา นิมนฺเตนฺติ – ‘‘เอหิ, ภนฺเต, หิรญฺญํ วา เต เทม, สุวณฺณํ วา เต เทม, เขตฺตํ วา เต เทม, วตฺถุํ วา เต เทม , คาวุํ วา เต เทม, คาวิํ วา เต เทม, ทาสํ วา เต เทม, ทาสิํ วา เต เทม, ธีตรํ วา เต เทม ภริยตฺถาย, อญฺญํ วา เต ภริยํ อาเนมา’’ติฯ ตตฺร เจ ภิกฺขุโน เอวํ โหติ, ‘ลหุปริวตฺตํ โข จิตฺตํ วุตฺตํ ภควตา, สิยาปิ เม พฺรหฺมจริยสฺส อนฺตราโย’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ อสฺสามิกํ นิธิํ ปสฺสติฯ ตตฺร เจ ภิกฺขุโน เอวํ โหติ, ‘ลหุปริวตฺตํ โข จิตฺตํ วุตฺตํ ภควตา, สิยาปิ เม พฺรหฺมจริยสฺส อนฺตราโย’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อนฺตราเย อนาปตฺติวสฺสจฺเฉทวาโร นิฏฺฐิโตฯ

114. สงฺฆเภเท อนาปตฺติวสฺสจฺเฉทวาโร

[202] อิธ ปน, ภิกฺขเว, วสฺสูปคโต ภิกฺขุ ปสฺสติ สมฺพหุเล ภิกฺขู สงฺฆเภทาย ปรกฺกมนฺเตฯ ตตฺร เจ ภิกฺขุโน เอวํ โหติ, ‘ครุโก โข สงฺฆเภโท วุตฺโต ภควตา; มา มยิ สมฺมุขีภูเต สงฺโฆ ภิชฺชี’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อสุกสฺมิํ กิร อาวาเส สมฺพหุลา ภิกฺขู สงฺฆเภทาย ปรกฺกมนฺตี’’ติฯ ตตฺร เจ ภิกฺขุโน เอวํ โหติ, ‘ครุโก โข สงฺฆเภโท วุตฺโต ภควตา; มา มยิ สมฺมุขีภูเต สงฺโฆ ภิชฺชี’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อสุกสฺมิํ กิร อาวาเส สมฺพหุลา ภิกฺขู สงฺฆเภทาย ปรกฺกมนฺตี’’ติฯ ตตฺร เจ ภิกฺขุโน เอวํ โหติ – ‘‘เต โข เม ภิกฺขู มิตฺตาฯ ตฺยาหํ วกฺขามิ ‘ครุโก โข, อาวุโส, สงฺฆเภโท วุตฺโต ภควตา; มายสฺมนฺตานํ สงฺฆเภโท รุจฺจิตฺถา’ติฯ กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อสุกสฺมิํ กิร อาวาเส สมฺพหุลา ภิกฺขู สงฺฆเภทาย ปรกฺกมนฺตี’’ติฯ ตตฺร เจ ภิกฺขุโน เอวํ โหติ – ‘‘เต โข เม ภิกฺขู น มิตฺตา; อปิ จ เย เตสํ มิตฺตา, เต เม มิตฺตาฯ ตฺยาหํ วกฺขามิฯ เต วุตฺตา เต วกฺขนฺติ ‘ครุโก โข, อาวุโส, สงฺฆเภโท วุตฺโต ภควตา; มายสฺมนฺตานํ สงฺฆเภโท รุจฺจิตฺถา’ติฯ กริสฺสนฺติ เตสํ วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อสุกสฺมิํ กิร อาวาเส สมฺพหุเลหิ ภิกฺขูหิ สงฺโฆ ภินฺโน’’ติฯ ตตฺร เจ ภิกฺขุโน เอวํ โหติ – ‘‘เต โข เม ภิกฺขู มิตฺตาฯ ตฺยาหํ วกฺขามิ ‘ครุโก โข, อาวุโส, สงฺฆเภโท วุตฺโต ภควตา; มายสฺมนฺตานํ สงฺฆเภโท รุจฺจิตฺถา’ติฯ กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อสุกสฺมิํ กิร อาวาเส สมฺพหุเลหิ ภิกฺขูหิ สงฺโฆ ภินฺโน’’ติฯ ตตฺร เจ ภิกฺขุโน เอวํ โหติ – ‘‘เต โข เม ภิกฺขู น มิตฺตา; อปิ จ, เย เตสํ มิตฺตา เต เม มิตฺตาฯ ตฺยาหํ วกฺขามิฯ เต วุตฺตา เต วกฺขนฺติ ‘ครุโก โข, อาวุโส, สงฺฆเภโท วุตฺโต ภควตา; มายสฺมนฺตานํ สงฺฆเภโท รุจฺจิตฺถา’ติฯ กริสฺสนฺติ เตสํ วจนํ, สุสฺสูสิสฺสนฺติ , โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อมุกสฺมิํ กิร อาวาเส สมฺพหุลา ภิกฺขุนิโย สงฺฆเภทาย ปรกฺกมนฺตี’’ติฯ ตตฺร เจ ภิกฺขุโน เอวํ โหติ – ‘‘ตา โข เม ภิกฺขุนิโย มิตฺตาฯ ตาหํ วกฺขามิ ‘ครุโก โข, ภคินิโย, สงฺฆเภโท วุตฺโต ภควตา; มา ภคินีนํ สงฺฆเภโท รุจฺจิตฺถา’ติฯ กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อมุกสฺมิํ กิร อาวาเส สมฺพหุลา ภิกฺขุนิโย สงฺฆเภทาย ปรกฺกมนฺตี’’ติฯ ตตฺร เจ ภิกฺขุโน เอวํ โหติ – ‘‘ตา โข เม ภิกฺขุนิโย น มิตฺตาฯ อปิ จ, ยา ตาสํ มิตฺตา, ตา เม มิตฺตาฯ ตาหํ วกฺขามิฯ

ตา วุตฺตา ตา วกฺขนฺติ ‘ครุโก โข, ภคินิโย, สงฺฆเภโท วุตฺโต ภควตาฯ มา ภคินีนํ สงฺฆเภโท รุจฺจิตฺถา’ติฯ กริสฺสนฺติ ตาสํ วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสติฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อมุกสฺมิํ กิร อาวาเส สมฺพหุลาหิ ภิกฺขุนีหิ สงฺโฆ ภินฺโน’’ติฯ ตตฺร เจ ภิกฺขุโน เอวํ โหติ – ‘‘ตา โข เม ภิกฺขุนิโย มิตฺตาฯ ตาหํ วกฺขามิ ‘ครุโก โข, ภคินิโย, สงฺฆเภโท วุตฺโต ภควตาฯ มา ภคินีนํ สงฺฆเภโท รุจฺจิตฺถา’ติฯ กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสติฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อมุกสฺมิํ กิร อาวาเส สมฺพหุลาหิ ภิกฺขุนีหิ สงฺโฆ ภินฺโน’’ติฯ ตตฺร เจ ภิกฺขุโน เอวํ โหติ – ‘‘ตา โข เม ภิกฺขุนิโย น มิตฺตาฯ อปิ จ, ยา ตาสํ มิตฺตา ตา เม มิตฺตาฯ ตาหํ วกฺขามิฯ ตา วุตฺตา ตา วกฺขนฺติ ‘ครุโก โข, ภคินิโย [อยฺยาโย (สี.)], สงฺฆเภโท วุตฺโต ภควตา; มา ภคินีนํ [อยฺยานํ (สี.)] สงฺฆเภโท รุจฺจิตฺถา’ติฯ กริสฺสนฺติ ตาสํ วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสาติฯ

สงฺฆเภเท อนาปตฺติวสฺสจฺเฉทวาโร นิฏฺฐิโตฯ

115. วชาทีสุ วสฺสูปคมนํ

[203] เตน โข ปน สมเยน อญฺญตโร ภิกฺขุ วเช วสฺสํ อุปคนฺตุกาโม โหติฯ ภควโต เอตมตฺถํ อาโรเจสุํฯ อนุชานามิ, ภิกฺขเว, วเช วสฺสํ อุปคนฺตุนฺติฯ วโช วุฏฺฐาสิฯ ภควโต เอตมตฺถํ อาโรเจสุํฯ อนุชานามิ, ภิกฺขเว, เยน วโช เตน คนฺตุนฺติฯ

เตน โข ปน สมเยน อญฺญตโร ภิกฺขุ อุปกฏฺฐาย วสฺสูปนายิกาย สตฺเถน คนฺตุกาโม โหติฯ ภควโต เอตมตฺถํ อาโรเจสุํฯ อนุชานามิ, ภิกฺขเว, สตฺเถ วสฺสํ อุปคนฺตุนฺติฯ

เตน โข ปน สมเยน อญฺญตโร ภิกฺขุ อุปกฏฺฐาย วสฺสูปนายิกาย นาวาย คนฺตุกาโม โหติฯ ภควโต เอตมตฺถํ อาโรเจสุํฯ อนุชานามิ, ภิกฺขเว, นาวาย วสฺสํ อุปคนฺตุนฺติฯ

วชาทีสุ วสฺสูปคมนํ นิฏฺฐิตํฯ